កាលពីព្រឹកមិញនេះលោកបណ្ឌិត អូន ព័ន្ធមុន្នីរ័ត្ន ទេសរដ្ឋមន្ត្រី
រដ្ឋមន្ត្រីក្រសួងសេដ្ឋកិច្ច និង ហិរញវត្ថុ
បានចូលរួមបើកកិច្ចប្រជុំសមាគមអ្នកវាយតម្លៃអាស៊ាន AVA លើកទី ១៩ ដែល
កម្ពុជាធ្វើជាម្ចាស់ផ្ទះបានដំណើរការហើយ
ដោយគ្រោងនឹងបញ្ចប់នៅថ្ងៃទី ៧ ខែឧសភា ឆ្នាំ២០១៦ នេះ
នៅសណ្ឋាគារសូហ្វីតែលដោយមានសមាជិកចំនួន ៨ ប្រទេសចូលរួម ។
នេះជាលើកទី ១ ហើយដែលកម្ពុជាទទួលបានសិទ្ធិធ្វើជាម្ចាស់ផ្ទះ
រៀបចំកិច្ចប្រជុំ សមាគម អ្នកវាយតម្លៃ អាស៊ាន
នេះបន្ទាប់ពីកម្ពុជាបានក្លាយជាសមាជិក AVA តាំងពីឆ្នាំ ២០០៩ មក ។
លោកបណ្ឌិត អូន ព័ន្ធមុន្នីរ័ត្ន បានថ្លែងថា
គោលបំណងនៃអង្គសមាជលើកទី ១៩ នេះ
គឺដើម្បីផ្ដល់នូវយុន្ដកាលនៃការចែករំលែកព័ត៌មាន និង
បទពិសោធន៍ពីគ្នាទៅវិញទៅមកក្នុងចំណោមតំណាងមកពីវិស័យសាធារណៈឯកជន
ស្ថាប័នវិជ្ជាជីវៈ អ្នកស្រាវជ្រាវ មជ្ឈដ្ឋានសិក្សា និង
ស្ថាប័នពាក់ព័ន្ធដទៃទៀត ដើម្បីធ្វើការពិភាក្សាអំពីបញ្ហាប្រឈម
ដែលពាក់ព័ន្ធនឹងការវាយតម្លៃ លើប្រធាន
«អាស៊ានតែមួយស្ដង់ដារវាយតម្លៃតែមួយ» ។
លោកបន្តថា ការបង្កើតស្ដង់ដារវាយតម្លៃអាស៊ាន
ពុំមែនជាកិច្ចការដ៏ងាយស្រួលឡើយ
ដែលតម្រូវឲ្យមានកិច្ចខិតខំប្រឹងប្រែងទាំងពេលវេលា និង កម្លាំងចិត្ត
ដើម្បីឈានទៅដល់កិច្ចព្រមព្រៀង
អនុវត្តជាសាកលសម្រាប់សមាជិកអាស៊ានទាំងអស់
ដែលស្ថិតនៅក្នុងដំណាក់កាលផ្សេងគ្នា
ទាំងការអភិវឌ្ឍន៍ក្នុងគ្រប់ខណ្ឌច្បាប់ និងបទបញ្ញត្តិ ។
លោកបន្ថែមថា
អង្គប្រជុំនេះនឹងជំរុញឲ្យមានកិច្ចសហប្រតិបត្តិការដ៏ជិតស្និត
ក្នុងចំណោមសមាជិកទាំងអស់
ក្នុងការរួមគ្នាអភិវឌ្ឍន៍វិជ្ជាជីវៈនៅក្នុងវិស័យវាយតម្លៃ
ក៏ដូចជាការលើកកម្ពស់សមាគមអ្នកវាយតម្លៃអាស៊ាន ឲ្យក្លាយទៅជា
សមាគមតែមួយនៅក្នុងតំបន់ និង ឆាកអន្ដរជាតិ ។ ជាមួយគ្នានេះផងដែរ លោក
គីម ហ៊ាង ប្រធានសមាគន៍អ្នកវាយតំលៃអាស៊ានបានមានប្រសាសន៍ថា
សមាគមសេដ្ឋកិច្ចអាស៊ាន គឺស្ថាប័នសេដ្ឋកិច្ច និង
នយោបាយដែលកំពុងស្ទុះឡើង និង
ជាកម្លាំងចលកមួយយ៉ាងសំខាន់ក្នុងបរិបទសេដ្ឋកិច្ច និង នយោបាយ
ដោយសមាគមទាំងមូលមានប្រជាជនសរុបទាំងអស់ចំនួន ៦០០ លាននាក់ និង
ទំហំតម្លៃទីផ្សារសរុបមានចំនួន ២,៦ ពាន់លានដុល្លារអាមេរិក និង
កំណើនជាមធ្យមចំនួន ៤,៩ ។
ជាការរំពឹងនៅឆ្នាំ ២០១៦ នេះ សមាគមអាស៊ាន
គឺជាទីផ្សារដែលកំពុងងើបឡើង និង ទាក់ទាញការវិនិយោគជាសាកល និង
ដើរតួនាទីជាក្បាលម៉ាស៊ីនសេដ្ឋកិច្ចយ៉ាងសំខាន់ក្នុងការជំរុញ
កំណើនសេដ្ឋកិច្ចអាស៊ី ៕
