ថ្លែងនៅក្នុងសិក្ខាសាលាស្តីពី « ការរៀបចំអភិវឌ្ឍន៍រាជធានីភ្នំពេញ បញ្ហាប្រឈម និងដំណោះស្រាយ » នៅសណ្ឋាគារអាំងទែរកុងទីណង់តាល់ កាលពីព្រឹកថ្ងៃទី២៩ មេសា លោកបណ្ឌិត ប៉ែន សុផល រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ និងជាអនុប្រធានអចិន្ត្រៃយ៍គណៈកម្មាធិការរៀបចំដែនដី និងនគរូបនីកម្មថ្នាក់ជាតិ បានមានប្រសាសន៍ថា ប្លង់គោលរាជធានីភ្នំពេញ ដែលត្រូវបានសម្រេចដាក់ឲ្យប្រើប្រាស់ដោយរាជរដ្ឋាភិបាល កាលពីថ្ងៃទី២៣ ខែធ្នូ ឆ្នាំ២០១៥ មានចក្ខុវិស័យរហូតដល់ឆ្នាំ២០៣៥ និងមានយុទ្ធសាស្ត្រគន្លឹះធំៗចំនួន៥ ដូចជា ៖
១-ភ្នំពេញជាប៉ូលស្នូល
២-ភ្នំពេញជាទីក្រុងប្រកបដោយគុណភាពអន្តរជាតិ
៣-ភ្នំពេញជាទីក្រុងដែលមានហេដ្ឋារចនាសម្ព័ន្ធបម្រុងទុកចាំបាច់
៤-ភ្នំពេញជាទីក្រុងដែលមានការរៀបចំនគរូបនីយកម្មជាទីក្រុងធំ
៥-ភ្នំពេញជាទីក្រុងដែលមានការការពារបេតិកភ័ណ្ឌតំបន់ពិសេសនានា និងតំបន់ទេសភាពទីក្រុង ។
ក្នុងនោះក៏មានយុទ្ធសាស្ត្រតូចៗចំនួន២៨ ផែនការសកម្មភាពអភិវឌ្ឍន៍ និងអភិរក្សរយៈពេលវែង រយៈពេលមធ្យម និងចំពោះមុខផងដែរ ។ បន្ទាប់ពីប្លង់គោលនេះ រាជធានីភ្នំពេញត្រូវធ្វើផែនការប្រើប្រាស់ដី ប្លង់លម្អិតនគរូបនីយកម្ម និងធ្វើបច្ចុប្បន្នភាពទិន្នន័យអភិវឌ្ឍន៍ជាប្រចាំនៃការវិវត្តរបស់ រាជធានីភ្នំពេញសម្រាប់ជាមូលដ្ឋានក្នុងការធ្វើបច្ចុប្បន្នភាពជា រៀងរាល់៥ឆ្នាំម្តង ។
លោករដ្ឋលេខាធិការបានកត់សម្គាល់ថា ៖ « ការវិនិយោគក្នុងវិស័យសំណង់ គឺមានកំណើនជារៀងរាល់ឆ្នាំ ។ ជាក់ស្តែង កាលពីឆ្នាំ២០១៥ គម្រោងវិនិយោគមានចំនួន២.៣០៥គម្រោង លើផ្ទៃក្រឡាសំណង់៧.៦៨៦.១១២ម៉ែត្រការ៉េ និងមានតម្លៃប៉ាន់ស្មាន៣.៣៣៨លានដុល្លារ ។ បើប្រៀបធៀបនឹងរយៈពេលដូចគ្នាក្នុងឆ្នាំ២០១៤ គឺមានការកើនឡើងប្រមាណ៣១,១៤% ។ ដោយឡែក នៅក្នុងរយៈពេល៣ខែដើមឆ្នាំ២០១៦នេះ គម្រោងវិនិយោគមានចំនួន៤៧៣គម្រោង ដែលមានផ្ទៃក្រឡាសំណង់៣.៧៩៩.៤០៤ម៉ែត្រការ៉េ និងមានតម្លៃប៉ាន់ស្មាន១.៦៤៧លានដុល្លារ » ។
គួររំឭកផងដែរថា នៅក្នុងកិច្ចប្រជុំគណៈរដ្ឋមន្ត្រី កាលពីខែធ្នូ ឆ្នាំ២០១៥ បានអនុម័តទាំងស្រុងនូវប្លង់គោលប្រើប្រាស់ដីនៅរាជធានីភ្នំពេញ ឆ្នាំ២០៣៥ ដែលជាឯកសារយុទ្ធសាស្ត្រគោលបម្រើឲ្យមហិច្ឆតារបស់រាជរដ្ឋាភិបាល ក៏ដូចជាសាលារាជធានីភ្នំពេញ ដែលមានគោលដៅ និងទស្សនវិស័យដល់ឆ្នាំ២០៣៥ ក្នុងការគ្រប់គ្រងតម្រង់ទិសការអភិវឌ្ឍសេដ្ឋកិច្ច ក្នុងព្រំប្រទល់រដ្ឋបាលរាជធានី និងតំបន់ទីប្រជុំជនពាក់ព័ន្ធទាំងឡាយនៅជុំវិញ ។
ការអនុម័តនេះ គឺដើម្បីឆ្លើយតបនឹងកំណើននៃការវិនិយោគឯកជន និងចំនួនប្រជាជនក្នុងរាជធានី តាមរយៈការតម្រង់ទិស និងជំរុញការវិនិយោគសាធារណៈ ស្របតាមរបបសេដ្ឋកិច្ចទីផ្សារសេរី និងការអភិវឌ្ឍតាមបែបប្រជាធិបតេយ្យថ្នាក់ក្រោមជាតិ ៕
