អភិបាលក្រុងប៉ោយប៉ែត លោក ង៉ោ ម៉េងជ្រួន បានមានប្រសាសន៍ថា៖ «តំបន់ប៉ោយប៉ែត ត្រូវបានរាជរដ្ឋាភិបាលអនុញ្ញាតឱ្យក្លាយទៅជាតំបន់ពាណិជ្ជកម្ម ឧស្សាហកម្មពិសេស ហើយពេលនេះចាប់ផ្ដើមមានអ្នកវិនិយោគធំៗចាប់អារម្មណ៍សិក្សា និងវិនិយោគ ព្រមទាំងមានអ្នកវិនិយោគធំៗមួយចំនួនបានមកវិនិយោគ ដោយសារតែតំបន់នេះមានលក្ខណៈភូមិសាស្ត្រអំណោយផល និងលក្ខណៈវិទ្យាសាស្ត្រ ។ តំបន់ប៉ោយប៉ែត ជាតំបន់ដែលមានជាយដែនជាប់នឹងព្រំដែនកម្ពុជា-ថៃ ហើយតំបន់នេះមានហេដ្ឋារចនាសម្ព័ន្ធផ្លូវថ្នល់ និងផ្លូវដែក ។ ដូច្នេះហើយវាបានផ្ដល់នូវភាពងាយស្រួលក្នុងការដឹកជញ្ជូន និងធ្វើពាណិជ្ជកម្មរវាងថៃ និងកម្ពុជា » ។
លោកអភិបាលក្រុងបន្តថា ៖ «សព្វថ្ងៃនេះ ក្រុងប៉ោយប៉ែតមានតំបន់សេដ្ឋកិច្ចពិសេស២ ដែលបានផ្ដល់ការងារជាច្រើនដល់ប្រជាពលរដ្ឋនៅក្នុងមូលដ្ឋាន និងប្រជាពលរដ្ឋមកពីតំបន់ផ្សេងៗទៀត ។ តំបន់សេដ្ឋកិច្ចទាំងពីរនៅក្នុងក្រុងប៉ោយប៉ែតមានតំបន់សេដ្ឋកិច្ច Chhay Chhay Investment និងតំបន់ឧស្សាហកម្មពិសេសសាន់កូ ដែលកំពុងដំណើរការសព្វថ្ងៃនេះ ។ តំបន់ឧស្សាហកម្មពិសេស Chhay Chhay Investment មានរោងចក្រកំពុងដំណើរការចំនួន៤ និង២រោងចក្រទៀតកំពុងដំណើរការសាងសង់ ។ ដោយឡែក តំបន់ឧស្សាហកម្មពិសេសមួយទៀតនោះ គឺមានរោងចក្រ១ កំពុងតែដំណើរការក្នុងតំបន់ តែតំបន់នេះមានក្រុមហ៊ុនបរទេសជាច្រើនបាននិងកំពុងសិក្សាដើម្បី វិនិយោគ ក្នុងនោះក្រុមហ៊ុនតូយ៉ូតា ក៏កំពុងរៀបចំដំណើរការសាងសង់រោងចក្រផងដែរ » ។
លោកបន្ថែមទៀតថា ៖ «ក្នុងចំណោមរោងចក្រទាំង៥ ដែលកំពុងដំណើរការនៅក្នុងតំបន់ឧស្សាហកម្មពិសេសទាំងពីរនេះ គឺបានផ្ដល់ការងារជូនកម្មករ-កម្មការិនីប្រមាណជា៧ពាន់នាក់ ហើយនៅក្នុងឆ្នាំ២០១៦-២០១៧ខាងមុខនេះ នៅពេលមានរោងចក្រថ្មីបើកដំណើរការ គឺអាចនឹងត្រូវការកម្លាំងពលកម្មបន្ថែមប្រមាណពី៨០០នាក់ទៀត ។ ក្រៅពីនោះ មានរោងចក្រមួយដែលនឹងបើកដំណើរការនៅពេលឆាប់ៗនេះ បានដាក់លិខិតសំណើសុំអន្តរាគមន៍ ប្រកាសរកកម្មករ-កម្មការិនីប្រមាណ៣ពាន់នាក់ទៀតឱ្យចូលបម្រើ ការងារ » ។
គួរបញ្ជាក់ថា ឆ្លើយតបនឹងការអភិវឌ្ឍ ក៏ដូចជាទំនាក់ទំនងជាមួយភាគីប្រទេសថៃ សព្វថ្ងៃនេះ កម្ពុជា-ថៃបាននិងកំពុងរៀបចំដំណើរការសាងសង់ស្ពានថ្មីមួយទៀត ដើម្បីឱ្យការធ្វើពាណិជ្ជកម្មរវាងកម្ពុជា និងថៃ កាន់តែមានភាពល្អប្រសើរ និងងាយស្រួល ៕
