កាមេរ៉ាទូរស័ព្ទ iPhone គឺជាឧបករណ៍ដ៏ពិសេសមួយ អាចផ្ដិតយករូបភាព និងវីដេអូបានយ៉ាងច្បាស់ជាងបណ្ដាស្មាតហ្វូនជាច្រើននាពេល បច្ចុប្បន្ន។ នៅលើកាមេរ៉ា iPhone នៅមានគន្លឹះជាច្រើនក្នុងការប្រើប្រាស់ឱ្យអស់លទ្ធភាព ប៉ុន្តែប្រហែលនៅមានអ្នកប្រើមួយចំនួន នៅពុំទាន់ស្វែងយល់ស៊ីជម្រៅអស់នៅឡើយ។ ដូច្នេះទំព័រនេះ យើងសូមលើកយកគន្លឹះ និងល្បិច ៥យ៉ាងដើម្បីប្រើកាមេរ៉ា iPhone ឱ្យកាន់តែមានអត្ថប្រយោជន៍។
១) ប្រើមុខងារបញ្ជាក់ភូមិសាស្ត្រ (Get Geographical)
មុខងារ Geographic នេះគឺប្រើ ដើម្បីបញ្ជាក់ពីទីតាំងរបស់រូប ដែលបានផ្ដិតចេញពីទីតាំង ឬតំបន់ណាមួយ។ ការធ្វើបែបនេះ គឺដើម្បីចំណាំ និងរៀបចំស៊េរីរូបទៅតាមតំបន់របស់អ្នកឱ្យមានសណ្ដាប់ធ្នាប់ និងងាយស្រួលបើកមើលឡើងវិញបានរហ័ស។
ដើម្បីបើកមុខងារ Geographic ត្រូវចូលទៅ Settings → General → Location Service ហើយបើក (On) លើ Location Service និង Camera។ ក្រោយពីបានបើកមុខងារនេះហើយ រូបថតដែលផ្ដិតចេញមក នឹងតម្រៀបទៅតាមទីតាំង ឬតំបន់។ ដើម្បីដឹងបានពីដំណើរការរបស់មុខងារនេះ អ្នកអាចចូលទៅមើលរូបនៅ Photos ហើយចុចយក Camera Roll ហើយរកមើលជម្រើស Places ដើម្បីចុចឱ្យបង្ហាញរូបថតតាមតំបន់។
២) Tap and Zoom
អ្នកអាចចុច tap លើកន្លែងណាមួយនៅលើអេក្រង់ដើម្បីចាប់ focus បានច្បាស់ (ពេលនោះនឹងមានរង្វង់បួនជ្រុងពណ៌ខៀវនៅលើអេក្រង់)។ នេះគឺមិនត្រឹមតែ focus នៅជុំវិញតំបន់មានរង្វង់ប៉ុណ្ណោះទេ ប៉ុន្តែថែមទាំងកំណត់ (adjust) ទម្រង់ exposure និង white balance ដោយស្វ័យប្រវត្តិ សម្រាប់ main area នៃរូបថតទៀតផង។ មុខងារ Tap and Zoom ថែមទាំងដំណើរការពេលថតវីដេអូផងដែរ។
នៅពេលមានរង្វង់ការ៉េបង្ហាញឡើង នោះរបារពង្រីករូប (Zoom) ក៏បង្ហាញដំណាលគ្នាដែរ ដែលអ្នកអាចធ្វើការពង្រីក ពង្រួមរូបតាមចិត្តបាន។
៣) Copy និង Paste រូបភាព
អ្នកអាច Copy រូបបានងាយស្រួល ពីវែបសាយផ្សេងៗ ហើយយកមក paste នៅក្នុង e-mail ឬ MMS បាន។ នៅក្នុងកម្មវិធី Safari គឺមានលក្ខណៈសាមញ្ញដោយគ្រាន់តែចុចឱ្យជាប់នៅលើរូបដែលអ្នកចង់ Save ឬ Copy។ នៅពេល save រូបរួច វានឹងបញ្ជាក់ថាបាន save។ អ្នកក៏អាច Copy រួចទៅ Paste នៅទីតាំងផ្សេងដូចជា អ៊ីមែល ឬ MMS ដែលអ្នកចង់ផ្ញើទៅមិត្តភ័ក្ដិផងដែរ។
៤) រៀបចំរូបថតនៅក្នុង Camera Roll
កម្មវិធី Camera Roll របស់អ្នក ក៏អាចត្រូវបានរៀបចំឱ្យមានសណ្ដាប់ធ្នាប់ដែរ ពោលគឺទៅលើរូបថតមិនច្បាស់ និងគ្មានរបៀបរៀបរយ គឺអាចលុបចោលបាន។ ម្យ៉ាងទៀតអ្នកក៏អាចកំណត់រូបដាក់នៅលើ thumbnail ដើម្បីបង្ហាញក្រុមរូបតែមួយ ងាយស្រួលចូលឆែក។ ដើម្បីអនុវត្ត ត្រូវចូលទៅ Photo → Camera Roll ហើយនៅក្នុង main thumbnail view រួចជ្រើសរើសរូបដើម្បីដាក់ thumbnail។
៥) កាត់តម្រឹមវីដេអូ (Trim Video)
នៅក្នុងកាមេរ៉ា iPhone ក៏មានមុខងារកាត់តម្រឹមវីដេអូផងដែរ។ ដូច្នេះអ្នកអាចកាត់ចូលនូវសាច់វីដេអូឥតបានការ ដើម្បីកុំឱ្យស៊ីស្ពេស (space) ធំ បណ្ដាលឱ្យឆាប់ពេញមេម៉ូរីបាន។ ដើម្បីអនុវត្តអ្នកគ្រាន់តែបើកចូលទៅ Camera Roll រួចរើសយកវីដេអូមួយមកកាត់ ដោយកំណត់រយៈពេលវីដេអូនៅក្នុងប្រអប់វែងមួយនៅផ្នែកខាងក្រោម។ វាមានជម្រើសសម្រាប់អ្នកក្នុងការកាត់ ដោយចុចលើប៊ូតុង (trim)៕
