ដើម្បីដោះស្រាយបញ្ហាគេងមិនលក់នេះ លោកអ្នកអាចសាកល្បងវិធីទាំងនេះ៖
១) កំណត់ពេលវេលាចូលគេងឲ្យទៀតទាត់៖ការកំណត់ ពេលវេលាគេងមិនច្បាស់លាស់ ក៏អាចជាមូលហេតុសំខាន់មួយដែលធ្វើឲ្យអ្នកមិនអាចគេងលក់ដែរ។ ដូច្នេះហើយ ការកំណត់ពេលចូលគេងច្បាស់លាស់នោះ វានឹងធ្វើឲ្យអ្នកអាចគេងលក់ស្រួលមិនខាន ដោយសារតែនៅពេលដែលដល់ម៉ោងដែលត្រូវត្រូវចូលគេងនោះ អ្នកនឹងមានអារម្មណ៍ថាងងុយដោយស្វ័យប្រវត្តិមិនខាន។ រាងកាយរបស់អ្នក គឺអាស្រ័យលើការទម្លាប់ប៉ុណ្ណោះ មានន័យថា បើអ្នកបង្កើតអ្វីដែលគ្មានរបៀប នោះអ្វីៗក៏គ្មានរបៀបទៅតាមហ្នឹងដែរ។
២) ជៀសវាងការពិសារកាហ្វេ ឬ ជាតិកាហ្វេអ៊ីនមុនពេលចូលគេង៖ ដាច់ខាតអ្នកមិនត្រូវទទួលទាន កាហ្វេ និង ភេសជ្ជៈផ្សេងៗដែលមានជាតិកាហ្វេអ៊ីននោះឡើយ ព្រោះវានឹងធ្វើឲ្យភ្នែករបស់អ្នកនៅតែស្រលះជានិច្ច មិនងាយនឹងគេងលក់នោះឡើយ។
៣) អានសៀវភៅ៖ ការអានសៀវភៅនៅពេលយប់ នឹងធ្វើឲ្យអ្នកមានអារម្មណ៍ថាងងុយគេង ហើយអ្នកមិនគួរព្យាយាមបន្តការអានទៀតនោះទេ ប្រសិនបើដល់ពេលដែលគូរគេងហើយ។ ដូច្នេះហើយសម្រាប់អ្នកដែលមានបញ្ហាគេងមិនលក់ គួរសាកល្បងអានសៀវភៅឲ្យបានច្រើនទំព័រ ព្រោះវាមិនត្រឹមតែធ្វើឲ្យអ្នកងងុយគេងប៉ុណ្ណោះ វាក៏ជួយឲ្យអ្នកទទួលបានចំណេះដឹងផងដែរ។
៤) ស្តាប់តន្ត្រី៖ តន្តីអាចជួយឲ្យអារម្មណ៍របស់អ្នកល្អប្រសើរនៅពេលរាត្រី ហើយវាក៏ជួយឲ្យអ្នកគេងលក់យ៉ាងងាយផងដែរ។ ដូច្នេះហើយរាល់ពេលជិតដល់ម៉ោងចូលគេង អ្នកគួរតែរៀបចំចម្រៀង និងតន្ត្រីប្រភេទណាដែលខ្លួនពេញចិត្ត ដើម្បីស្តាប់។
៥) រៀបចំបន្ទប់គេងឲ្យមានរបៀប៖ ត្រូវប្រាកដថា បន្ទប់គេងរបស់អ្នកគឺមានរបៀបរៀបរយ ដែលធ្វើឲ្យអ្នកមានអារម្មណ៍ថា ជាកន្លែងដែលគួរឲ្យចង់គេង ព្រោះបើបន្ទប់គេងគ្មានរបៀប និង គ្មានអនាម័យនោះវានឹងធ្វើឲ្យអារម្មណ៍របស់អ្នកមិនសុខស្រូលនោះ ឡើយ។
៦) ហាត់ប្រាណឲ្យទៀងទាត់៖ ការហាត់ប្រាណ ពិតជាមានសារសំខាន់ខ្លាំងណាស់សម្រាប់ សុខភាពរាងកាយ និង សតិអារម្មណ៍។ កាលណាអ្នកមានសុខភាពរឹងមាំ និង មានអារម្មណ៍ស្រស់ថ្លា វាក៏ជួយឲ្យការគេងសុខស្រួលទៅតាមហ្នឹងដែរ៕
